სამართლის მაგისტრი, დოქტორანტი, ბიზნეს სამართლის ადვოკატი. სხვადასხვა დროს იყო ივანე ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტის მოწვეული ლექტორი. სამართლის მიმართულებით არის რამდენიმე სამეცნიერო ნაშრომის ავტორი. 2016 წლიდან აქვს კერძო საადვოკატო კომპანია.
მაქვს პატივი, ვიყო „ლელოს“ მაჟორიტარობის კანდიდატი სამტრედიაში, ხონში, ვანსა და წყალტუბოში. ეს გადაწყვეტილება მიმაღებინა იმ მძიმე მდგომარეობამ, რომელიც შექმნილია, როგორც მთელს ქვეყანაში, ასევე იმერეთის ამ ულამაზეს მხარეში, სადაც დავიბადე და ცხოვრების უდიდესი ნაწილი გავატარე. წლების განმავლობაში ხელისუფლებების გაუაზრებელმა და არასწორმა პოლიტიკამ ამ რაიონების მოქალაქეებს ხვალინდელი დღის იმედი დააკარგვინა. ახალგაზრდებს წაართვა მომავლის რწმენა, ხოლო ხანდაზმულ ადამიანებს მშვიდი სიბერის გარანტია. დღეს მოქალაქეთა აბსოლუტური უმრავლესობა თავის გადასარჩენად იბრძვის და შვილებისათვის ელემენტარული პირობების შესაქმნელად. დამერწმუნეთ, ის მძიმე და უიმედო მდგომარეობა, რომელშიც უმრავლესი თქვენგანი იმყოფება, არ არის ნორმა და ყველას ერთად შეგვიძლია სასიკეთო ცვლილებების მიღწევა. ამისათვის საჭიროა ხელისუფლებაში იყვნენ ის ადამიანები, რომელთა ერთადერთი საზრუნავი საკუთარი კეთილდღეობა კი არა, მოსახლეობის პირობების გაუმჯობესებაა.
დროა, დავიწყოთ ცვლილებები! დროა, ხელისუფლება ჩადგეს ხალხის სამსახურში!
რაც შეეხება ჩემს პოლიტიკურ საქმიანობას, „ლელოში“ ვარ იურისტთა ჯგუფის წევრი. ამ მცირე ხნის განმავლობაში აქტიურად ვიყავი ჩართული უამრავ აქტივობაში, მათ შორის, აქტიურად ვაპროტესტებდი უკანონო მშენებლობებს, ხოლო აქციებზე უკანონოდ დაკავებულებს ვეხმარებოდი სასამართლო წარმოებისას. პოლიტიკაში შემოვედი იმიტომ, რომ ჩემთვის, როგორც მოქმედი ადვოკატისთვის, რთული აღმოჩნდა ყოველდღიურ რეჟიმში მეყურებინა უსამართლობისთვის. შეუძლებელია ის ქვეყანა იყოს წარმატებული, რომელსაც აქვს ისეთი უსამართლო სასამართლო, როგორიც საქართველოშია.
დამერწმუნეთ, მალე ვიცხოვრებთ ისეთ სახელმწიფოში, სადაც ყველა ადამიანი ერთნაირად დაცული და დაფასებული იქნება, მათი კანონიერი უფლებები კი ხელშეუხებელი.