იურისტი. ადვოკატი 16 წლიანი პროფესიული გამოცდილებით. 2005 წლიდან აქტიურად არის ჩართული პოლიტიკურ პროცესებში. თავისი პროფესიიდან გამომდინარე, წლების განმავლობაში იცავდა ადამიანის უფლებებს. ამჯერად „ლელოსთან“ ერთად იბრძოლებს ქვეყანაში სამართლიანი სასამართლო სისტემის დასამკვიდრებლად.
ჩემო მეგობრებო, გპირდებით, რომ ყოველთვის ვიქნები თქვენს გვერდით, ვიქნები თქვენი მხარდამჭერი და თითოეული თქვენგანის უფლებადამცველი. 17 წელია ვიცავ სახელმწიფოსგან დაჩაგრული ადამიანების უფლებებს. ჩემთვის საპარლამენტო ტრიბუნა იქნება საშუალება, უფრო ეფექტურად დავიცვა თქვენი უფლებები და წარმოვადგინო თქვენი ინტერესები საქართველოს პარლამენტში. არასოდეს შემშინებია გამოწვევების, არასდროს დამიხევია უკან და არასდროს გავქცევივარ პასუხისმგებლობას. მე არ დაგპირდებით იმაზე მეტს რისი გაკეთებაც თქვენთვის არ შემიძლია.
ჩვენი ქვეყნის განვითარების უალტერნატივო გზა არის ქვეყნის ევრო-ატლანტიკური კურსი, რომელსაც ბოლო წლებია, რეალური საფრთხე ემუქრება მოქმედი ხელისუფლების მხრიდან. ქვეყანაში მოქმედი მართლმსაჯულების სისტემა ორიენტირებული არის არა ადამიანის უფლებების დაცვისაკენ, არამედ მხოლოდ ხელისუფლების ინტერესების გატარებისკენ. გვაქვს სასამართლო, რომელსაც ენდობა მხოლოდ ხელისუფლებაში გაბატონებული კლანი და არა რიგითი მოქალაქეები. ქვეყნის განვითარების გასაღები თავისუფალი და სამართლიანი სასამართლო სისტემაა, სადაც თითოეული მოქალაქე შეძლებს, იპოვოს სამართალი.
მრავალი წელია, როგორც ადვოკატი და როგორც რიგითი მოქალაქე, აქტიურად ვარ ჩართული პოლიტიკურ პროცესში. რთულია, საქართველოს მძიმე სამართლებრივი, სოციალურ-ეკონომიკური და პოლიტიკური ფონის შემხედვარეს, არ გაგიჩნდეს პროტესტი. მითუმეტეს, იმ ფონზე, როდესაც ჩვენს გარშემო უდანაშაულო ადამიანების უფლებები ირღვევა, მოშლილია ინსტიტუციები და ქვეყანა იმართება ერთი ადამიანის ნება-სურვილით. მიუხედავად საზოგადოების მოთხოვნისა, სასამართლო და სამართალდაცვითი სისტემა საერთოდ არ ასრულებს თავის ფუნქციებსა და მოვალეობებს. რიგითი მოქალაქეები ვერ ენდობიან არსებულ მართლმსაჯულების სისტემას. ჩვენი ქვეყნისთვის სასიცოცხლოდ მნიშვნელოვანია, გავხდეთ ევროპული და ევრო-ატლანტიკური ოჯახის სრულფასოვანი წევრი, რასაც არსებული ხელისუფლება მიზანმიმართულად ხელს უშლის.
ამ ყველაფერმა გადამაწყვეტინა, ვიყო პოლიტიკაში და პოლიტიკურ გაერთიანება “ლელო საქართველოსთვის“-თან ერთად ვიბრძოლო უსამართლო სისტემის დანგრევის, ქვეყანაში სამართლიანობის დამკვიდრებისა და ქვეყნის დასავლური მომავლის უზრუნველყოფისათვის.