საჯარო სამართლის იურისტი. სამოქალაქო აქტივისტი. თსუ-სა და სოხუმის სახელმწიფო უნივერსიტეტის სამართალმცოდნეობის ფაკულტეტის კურსდამთავრებული. წლების განმავლობაში იბრძოდა სხვადასხვა სოციალურ საკითხზე: შრომითი უფლებები, მწვანე პოლიტიკა. იყო სტუდენტური მოძრაობის ერთ-ერთი ლიდერი და თანადამფუძნებელი.
ჩემთვის ძალიან დიდი პასუხისმგებლობაა, მოგმართოთ, როგორც ბათუმის მაჟორიტარი დეპუტატობის კანდიდატმა. მე ვარ ბათუმელი და ბათუმელის სტატუსი საკუთარ თავში ბევრ მნიშვნელობას ატარებს, როგორც განსხვავებული ღირებულებების და კარგი მოქალაქის, რომელიც უნდა ზრუნავდეს საკუთარ ქალაქზე.
სამწუხაროდ, ჩვენი ქალაქი კარგავს საკუთარ სახეს, უსახურდება მისი სილუეტი, ბეტონდება, ნადგურდება კულტურული მემკვიდრეობა, ნაკლები დრო და რესურსი ეთმობა კულტურულ და სპორტულ ღონისძიებებს.
გარდაუვლად აუცილებელია, რომ ბათუმი ვაქციოთ საზღვაო ინდუსტრიის ცენტრად, მასწავლებლები, მეზღვაურები, მშენებლები და საკუთარი საქმის სპეციალისტები იყვნენ დაფასებულები.
ჩემი მთავარი მიზანია, შევქმნა წარმატებული შემთხვევა ბათუმის მაჟორიტარი დეპუტატის მაგალითზე, როცა დეპუტატი იქნება ხალხის გვერდით, არჩევის შემდეგ თავიდან დაივლის ქუჩებს, კიდევ ერთხელ მოისმენს ყველა პრობლემას და საკუთარ ამომრჩეველს გაკეთებული საქმეებით დაუბრუნდება. ჩემი მიზანია, ადამიანებს დავუბრუნო რწმენა და იმედი, რომ არსებობენ პოლიტიკოსები, რომლებიც ფიქრობენ ხალხზე და საკუთარ ქალაქზე. მთელ საქართველოში მე ვარ ყველაზე ახალგაზრდა მაჟორიტარი დეპუტატობის კანდიდატი და ეს მაძლევს დამატებით განცდას, რომ ეს ქვეყანა ჩვენი, ახალგაზრდების შესაცვლელია!
8 წლიანი სამოქალაქო აქტივიზმის პირობებში ჩართული ვიყავი ყველა ახალგაზრდულ მოძრაობაში, რომელიც ადამიანის უფლებებს და საზოგადოებისთვის მნიშვნელოვან საკითხებს ეხებოდა. წლების განმავლობაში ვიყავი ერთ-ერთი ორგანიზატორი შრომითი უფლებების დაცვისთვის გამართული გაფიცვებისა – ბათუმში, ჭიათურაში, ტყიბულში, ქსანში, კაზრეთში, აგარაში, ზესტაფონსა და რუსთავში. საყდრისის დაცვის ორგანიზაციის წევრი, თანამებრძოლებთან ერთად ვიბრძოდით გარემოსდაცვითი და ეკოლოგიური პრობლემების გადაწყვეტისთვის, კულტურული მემკვიდრეობის გადასარჩენად და დასაცავად ქალაქებსა და სოფლებში, მუდმივად ვსაუბრობდით განათლების ხარისხის და ხელმისაწვდომობის საკითხებზე, ვმუშაობდით სტატუსშეჩერებული სტუდენტების პრობლემებზე. წლების განმავლობაში ვუწევდით საზოგადოებრივ მონიტორინგს მრავალ კანონპროექტს საქართველოს პარლამენტში. 8 წლიანი სამოქალაქო აქტივიზმის პირობებში ვთანამშრომლობდი არაერთ ევროპულ, ამერიკულ და საერთაშორისო ფონდთან და ინსტიტუტთან.