სიახლეები

ანი მიროტაძე
10 / 100

ანი მიროტაძე

პოლიტიკოსი. ჟურნალისტი. ძლიერი, პრინციპული და შეუპოვარი. 20 წლიანი ჟურნალისტური გამოცდილებით. საქართველოს მე-8 მოწვევის პარლამენტის წევრი. ვერ ეგუება უსამართლობას და იცის, რომ საკუთარი მაგალითით უნდა აჩვენოს ყველას, რომ ბრძოლას ყოველთვის აქვს აზრი და თავისუფლებისთვის ბრძოლა აუცილებლად მთავრდება საბოლოო გამარჯვებით.

მიმართვა

ვამაყობ, რომ ზემო იმერეთის შვილი ვარ. ვამაყობ, რომ ჩემი ფესვები აქ არის! ვამაყობ, რომ თქვენიანი ვარ, რომ მელოდებით და გჯერათ ჩემი!

თქვენთან ერთად ჩემი ბრძოლა იქნება შეუპოვარი – ქვეყნისა და რეგიონის უკეთესი მომავლისთვის, თავისუფლებისთვის, კეთილდღეობისა და წარმატებისთვის. ბრძოლა იქნება ზუსტად ისეთი, როგორიც ეკადრება იმ ერს და ხალხს, ვინც ათასწლეულების და საუკუნეების განმავლობაში იცავდა საკუთარ თავისუფლებას და ამ ბრძოლებში გმირობის ისტორიებს წერდა.

ჩვენც ჩვენი ისტორია გვაქვს დასაწერი! ჩვენს თაობასაც თავისი „ლელო“ აქვს დასადები მავთულხლართებში გახვეული, ოკუპირებული სამშობლოს თავისუფლებისთვის.

არჩევანი არის ძალიან მკაფიო და მარტივი, რომელიც ჩვენმა ქვეყანამ უკვე გააკეთა – ჩვენ მივდივართ იქ, სადაც არის ჩვენი ისტორიული ადგილი – დიდ ევროპულ ოჯახში! ჩვენ უნდა ავაშენოთ ევროპული ღირებულებების, განვითარებული, დემოკრატიული, თავისუფალი ადამიანების თავისუფალი ქვეყანა!!! სხვა ყველაფერი არის წარსული.

ჩვენ ერთად გავიმარჯვებთ!ჩვენ საქართველოს დამოუკიდებლობის გარიჟრაჟზე ასეთი საქართველოსთვის ვიბრძოდით! ეს ბრძოლა ბოლომდეა მისაყვანი!

პოლიტიკური საქმიანობა

 

პოლიტიკაში მოვედი 2011 წელს. გადაწყვეტილება, რომელიც მივიღე, არ იყო მარტივი და ეს გადაწყვეტილება გახდა ჩემი ცხოვრების ახალი და ძალიან საინტერესო ეტაპის დასაწყისი. პოლიტიკაში შემოსვლიდან მალევე, 2012 წელს, ჩემმა გუნდმა და ქართველმა ხალხმა მომცა ნდობა და მანდატი, გავმხდარიყავი საქართველოს პარლამენტის წევრი. წავედი იმისათვის, რომ გამეკეთებინა ყველაფერი, რადგან ჩემი ქვეყნის და ჩემი ხალხის მომავალი ყოფილიყო უკეთესი; რადგან ჩვენ აუცილებლად უნდა გვქონდეს დემოკრატიული, თავისუფალი, ევროპული, განვითარებული ქვეყანა. ახლაც ზუსტად ამ განწყობით ვერთვები მორიგ, ძალიან მნიშვნელოვან პოლიტიკურ ბრძოლაში ლელოსთან ერთად. „ლელო საქართველოსთვის“ არის ძალა, რომელსაც აქვს უზარმაზარი შანსი, შეცვალოს ამ ქვეყნის უმძიმესი რეალობა. მე ვიღებ ამ უზარმაზარ გამოწვევას და ვამბობ – დიახ, ჩვენ შეგვიძლია! დიახ, „ლელო“ საქართველოს მომავალია!