არქიტექტორი და ურბანისტი, საქართველოს ტექნიკური უნივერსიტეტის ასისტენტ პროფესორი. ლისაბონის უნივერსიტეტში მუშაობდა სადოქტორო პროგრამაზე ქალაქის გამწვანებისა და ეკოლოგიის მიმართულებით, არის არაერთი საინტერესო პროექტისა და სტატიის ავტორი. ქალაქის გამწვანების აქტიური დამცველი. სტუდენტთა განვითარების ფონდის დამფუძნებელი.
ძვირფასო თანამოქალაქენო, ზესტაფონელებო, თერჯოლელებო, ბაღდათელებო და ტყიბულელებო, მიხარია, რომ მე ვარ თქვენი წარმომადგენელი.
გვაქვს შესაძლებლობა და ასპარეზი, ვიბრძოლოთ ჩვენი ქვეყნისთვის, შევქნათ ნამდვილი სახელმწიფო და ჩვენვე ვიცხოვროთ უკეთეს გარემოში.
ამიტომ უნდა ავირჩიოთ არა წარსული, არამედ მომავალი.
მომავალი არის განახლებასა და განვითარებაში;
მომავალი არის სიმართლესა და სამართლიანობაში;
მომავალი არის ერთიანობასა და თანადგომაში;
მაინც რა გვინდა ხვალინდელი დღისგან? რაში ვხედავთ გამოსავალს?
გვინდა უსაფრთხოება და დაცულობა? მაშინ ავირჩიოთ წესიერი და პატიოსანი ადამიანები
გვინდა წარმატება და კეთილდღეობა? მაშინ ავირჩიოთ პასუხისმგებლიანი და კვალიფიციური ადამიანები. გვინდა უკეთესი ხვალინდელი დღე? მაშინ ერთად ავირჩიოთ “ლელო”.
ჩემთვის პატივია, თქვენთან ერთად ჩავერთო იმ უმნიშვნელოვანეს ბრძოლაში, რომელსაც საქართველოს გადარჩენა ჰქვია.
ჩვენი საერთო ძალისხმევით ზესტაფონი გახდება მწვანე ინდუსტრიული ზონა, თერჯოლა – ინოვაციებისა და სოფლის მეურნეობის გზაჯვარედინი, ტყიბული – სწრაფი განვითარებისა და ტექნოლოგიური ტრანსფორმაციის მაგალითი, ხოლო ბაღდათი – სამედიცინო ტურიზმის ცენტრი. უნდა გაიზარდოს დასაქმება და ხალხის შემოსავალი.
პოლიტიკაში შემოვედი სუფთა ხელებით, იმ ქვეყნის მშენებლობისთვის, სადაც აღარ შეგვეშინდება ხვალინდელი დღის და სადაც ადამიანი იქნება მთავარი საზრუნავი, სადაც მოქალაქე იქნება ხელისუფალი.
მე მოვედი პოლიტიკაში დიდი გამარჯვებისთვის. არა ჩემი, არამედ თქვენი გამარჯვებისთვის, თქვენი კეთილდღეობისთვის, თქვენი უფლებების დაცვისთვის, თქვენი შვილების განათლებისთვის, თქვენი ოჯახის უსაფრთხოებისთვის, ჩვენი ქვეყნის ნათელი მომავლისთვის.
2019 წელს შევუერთდი მოძრაობა “ლელოს”. ეს იყო ახალი პლატფორმა, რომელიც აცხადებდა, რომ გარშემო იკრებდა ყველა მოქალაქეს, ვისაც ჩვენი ქვეყნის ბედი ადარდებდა. ზუსტად ვიცოდი, რომ ამ ადამიანებს შორის ვიყავი და ყოველგვარი ყოყმანის გარეშე ჩავერთე ქვეყანაში მიმდინარე პოლიტიკურ პროცესებში.