პროფესიით ინჟინერ-ეკონომისტი, არასამთავრობო ორგანიზაცია „ადამიანის უფლებები და კორუფციასთან ბრძოლის“ დამფუძნებელი. იყო სამეგრელო-ზემო სვანეთში სახელმწიფო რწმუნებულის პირველი მოადგილე. 2008 წლის რუსეთ-საქართველოს ომის დროს იყო ერთადერთი სახელმწიფო მოხელე, რომელსაც არ დაუტოვებია დაკავებული პოზიცია, ბოლო წუთამდე ზრუნავდა სამეგრელოს მშვიდობიანი მოსახლების უსაფრთხოებაზე და ხელმძღვანელობდა მნიშვნელოვან მოლაპარაკებას საოკუპაციო ჯარების მეთაურებთან.
ჩვენ დღიდან ჩემი დაბადებისა, სულ ერთად ვართ. სიხარული, ტკივილი, სიდუხჭირე, ყველაფერი ერთად გამოვიარეთ, მაგრამ ზუგდიდზე უარი არასდროს მითქვამს. პირიქით, მთელი ჩემი შეგნებული ცხოვრება ვცდილობდი, რაიმე ღირებული გამეკეთებინა ზუგდიდისა და ზუგდიდელებისთვის. ამ ყველაფერმა გადამაწყვეტინა, ვიყო თქვენი მხარდამჭერი პარლამენტში. წლებია, ვაკვირდებით პოლიტიკოსების მიერ დაბინძურებულ ველს, სადაც თავისუფალი არჩევანისთვის ადგილი არ რჩება. ეს რეალობა ერთად უნდა შევცვალოთ და ცვლილებები ზუგდიდიდან დავიწყოთ. მე არასოდეს მიღალატია პრინციპებისათვის, ზურგი თქვენთვის არასოდეს შემიქცევია, ყოველთვის ვაკეთებ იმას, რასაც ვამბობ.
მოლოდინი მაქვს, რომ გავიმარჯვებთ და ამის იმედს მაძლევს გუნდი, რომელიც ზურგს მიმაგრებს – განათლებული, ჭკვიანი, სუფთა წარსულისა და სამშობლოს სიყვარულით შეპყრობილი ადამიანები. ჩვენ, ზუგდიდელები, ვიტყვით გადამწყვეტ სიტყვას ჩვენი და აფხაზების შერიგების საქმეში. ცარიელი სიტყვებისა და დაპირებების დრო წარსულს უნდა ჩაბარდეს.
მთელი ცხოვრება ვიბრძოდი და ვცდილობდი, სამართლიანი, თანასწორუფლებიანი, კონკურენტუნარიანი სახელმწიფოს შექმნაში მიმეღო აქტიური მონაწილეობა, წლების განმავლობაში ვიყავი სამოქალაქო აქტივისტი. ეს იყო მთავარი მიზეზი, რატომაც დავაარსე არასამთავრობო ორგანიზაცია „ ადამიანის უფლებებისათვის და კორუფციასთან ბრძოლა“, რათა უკვე სხვა პლატფორმიდან მეთქვა სიტყვა და შევწინააღმდეგებოდი უსამართლობას.
შემდეგ იყო ვარდების რევოლუცია, სადაც პირველი დღიდან ვიდექი ხალხთან ერთად, რათა შემეცვალა სიბნელე, კრიმინალი, რეგრესი ამ ქვეყანაში. 2004 წლიდან 2009 წლამდე გახლდით სამეგრელო ზემო სვანეთის რწმუნებულის I მოადგილე, ჩემი მთავარი მიმართულება იყო ეკონომიკის განვითარებაზე პასუხისმგებლობა და დღემდე ვამაყობ ისეთი პროექტებით, როგორებიცაა ანაკლია, მესტია და სხვა.
დღემდე ერთგული ვრჩები ადამიანის უფლებების დაცვის, კანონის უზენაესობის და დემოკრატიული, თავისუფალი არჩევნების პრინციპის დამკვიდრებაში.
ჩემი ხედვები აბსოლუტურ თანხვედრაშია „ლელოსთან“. ჩვენ ერთად ვიბრძოლებთ ნაციონალური პრობლემების გადაწყვეტაში.